سلوي محمد علي تكتب ؛-
# بلاش تعيشوا الدور ... و افرحوا ...#
هي الناس ليه بقت مش حبه تفرح اوخايفة تصدر أنها فرحت أو انبسطت أو اتحسنت أحوالهم ..... هي الناس ليه ماسكة في بؤسها و خايفة تشوف حاجة غيره .
هي الناس ليه بقت علي طول مصدرة الكابة والقلق و الخوف و أمراضها و اوجاعها و مش عارفين يستمتعوا بأي حاجة حلوة بتحصل ليهم و موجودة حواليهم .
اللي بيسعي لحاجة ...بتسعاله ...لو سعيت للخير هيجيلك ...لو سعيت للخذلان هيجيلك ...لو ادعيت المرض هيصيبك .. كما قال رسولنا الكريم ...
لاتمارضوا ...فتمرضوا ...فتموتوا.
لما تشوف حد منهم و تكون عارف أنه مثلا جاب عربية جديدة أو حالته المالية اتحسنت و لا جاله علاوة أو اي زيادة ولا الدنيا زهزهت معاه .... و برضه يصدرلك أنه قرفان و زعلان و مرضان و حيران ويبدا كلامه بسرد لاحداث مؤسفة و لامراض و روايات موجعة .... و يدخلك في دوائر قلق مفتعلة متعرفش تخرج منها .
هو احنا ليه بقينا كده ... بنخاف من بعض اوووي ليه كده ...من الاول اختار وقرب اللي يناسبك علشان لا يكذب عليك و لا يحور معاك .
هو احنا ليه بقينا مش بتعرف نفرح ...ولو فرحنا نخبي فرحنا و راحتنا و نستكتر علي أننا نفرح الباقين معانا .
بيقولوا الضحك عدوي ...يعني لو هتضحك كل اللي حواليك هيقلدوك ...و النكد كمان عدوي ....و البؤس و الشقاء و الاكتئاب عدوي ... بلاش تكون مصدر للسلبية المدمرة و يضيع الصدق فينا ....و خليك مصدر للطاقات الإيجابية ذي الحب و السعادة والفرح والرضا واليقين وحسن الظن بالله **تفاءلوا ...بالخير ....تجدوه.** .
الحسد مذكور في القرءان صح ..بس بلاش نعيش الحسد المرضي اللي بيفرق الارحام و يستدعي الآلام و يضيع الاحلام ....و طالما عامل اللي عليك و مخرج صدقاتك و مؤمن و متمسك بعقيدتك بصدق .... و الأهم بتقول الحمد لله و الشكر لله و تسيبها ديما علي اللي خلقني و خلقك .
من الاخر ...حاولوا تعيشوا بصدق ....السعادة قرار ...و اسعاد الاخر اختيار ...اتمني تعيشوا صح ...
تحياتي ....
مؤسس مبادرة احنا أولي... احنا قدها و عضو مؤسس مبادرة فكرتك ثروتك. ..حقق حلمك و سفيرة مؤسسة بهية للتشخيص المبكر للأورام.
