رساله قويه لكل مظلوم ومضطهد ومعنف بيتعرض للظلم من مجتمعنا
فهيم سيداروس
أتمني إن كل قضايا التنمر، والتحرش والاعتداء تكون بهذا الحسم وياريت الحكم يشمل عدم التعرض لها من قريب او بعيد ويعتبروا المتهم مسئول مسئولية مباشرة عن سلامتها حتى لا يفكر احد من الانتقام منها.
وبهذا أخدت حكم قضائي وهذا في مصر 10٪ من الحق .. في غياب الدولة احتمال كبير اهل المتهم ياخدوا بيتها او ياخدوا اضعاف المبلغ دا منها.
الحكم شئ رائع بس المناخ ضايع وغياب الظبط في الشارع والريف مريع، مستحيل تقدر هي او اخواتها يباتوا ليلة واحدة في القرية بعد الحكم دا لان الشرطة مش مسيطرة -بارادتها- والريف كله توازنات عائلية.
تخيل عيله 200 او 300 اسرة تقريبا واحد فيهم يتسجن بسبب المسكينة دي .. وخلي بالك مفيش عند العائلات صح وغلط ولا الكلام دا كله بقي له وجود من زمان قوي.
مسكينة الحكم دا كانه حكم عليها لان مؤسسات كتيرة اختفت من الوجود عمليا والواقع كله في ايدي الهمج.
قصة رانيا رشوان
من قريه في الفيوم ابوها وامها متوفيين وعايشه مع اخواتها البنات .. البنت اتعرضت للخطف والضرب المبرح والسرقه والتهديد بالقتل شهر يونية اللي فات عشان قلعت النقاب ومن بعدة الحجاب.
ومن اول ما اختارت تقلع الحجاب وهي بتمشي في القريه منبوذة والناس هناك طلبوا منها تاخد اخواتها وترحل عن قريتهم لانها مبقتش شبهم ولا في مستوى طهرهم ونضافتهم.
رانيا ليها اخ انتحر من حوالي سنه بسبب تنمر اهل القريه بيه لان كان ليه افكار بتحترم حقوق الانسان ورافض للتمييز بين البشر بسبب الهويه.
النهاردة محكمة الفيوم دائرة جرائم العنف ضد المراة. حكمت بحبس المتهم الرئيسي واللي حرض أهل القرية على رانيا. المتهم "أحمد تحيف" 6 شهور و ٢٨ الف جنيه غرامه عن تهمه التنمر ومبلغ ١٠٠ الف جنيه علي سبيل التعويض المدني هيدفعهم لرانيا.
شكرا للمنظمات النسائيه، والحقوقيه اللي وقفت جنب رانيا ودعمتها.
حكم النهاردة بمثابة رساله قويه لكل مظلوم ومضطهد ومعنف بيتعرض للظلم من مجتمعنا الرجعي البشع بطبعه انه مايسكتش ويعلي صوته لان صرخات المضطهدين بقت تعلي للسما والكل بيسمعها.
والمجرم مهما كان متحصن بثقافته اللي بتحميها الاغلبيه المغيبه او باسانيدة الدينيه المقدسة هيتجاب ويتحاسب وهيكون عبرة .
مؤسسة_المرأة_الجديدة.......... مكتب_المسانده_القانونية
