سألتك.. بقلم الشاعرة: علا بركات
وسألتك ليه السما والنور
نازلين للشجر اللي ماورقش
وازاي بتلومني عشان باحلم
أحلام بتقول مش مسموحه
وازاي بتلوم نقطه اندلقت
م اللون الأخضر ع اللوحه
بايدين بتدرو على بكره
مع ان الليل خلفية عمر
خطين يرسموا أحلام خضره
واصله لحد حدود الشمس
وانا بس حاولت اني اتمنى
ماحاولتش افسر حلم اليوم
ماقصدتش أأول رؤية أمس
ماقصدتش أبدا أرجع شيء
مفقود مكتوبله لابد يضيع
والله ماباقصد اخلي خريف
الحلم التايه بينا ربيع
معلهش خيالي ماهوش محدود
أنا عارفه الحلم ف أرض الواقع
مش موجود. .
قطارات العمر اللي انطلقت
لجهات مختلفه ماهيش هتعود
.......
يا طريق مكتوبلي ومش هامشيه
أشواك الورد اللي بيملاه. .
الخطوه عليه بتدوب إحساس
ونزيف النبض التايه فيه..
ممزوج بآهات الفرح معاه
يا نزيف بيمد قلوبنا حياه
وكتير متاهات بتاخدنا بعيد
وكتير حكايات بتاخدنا إليه
وانا هاعمل ايه ف جيوش الصد
وسلاح مايصيبش إلا قلوبنا
لو كان بإيديا سنين البعد
أنا كنت لاغيتها من الأيام
وبنيت من قلعة صمتي كلام
وقفلت طريقك ع الأوهام
ورسمت الشوق صفين إحساس
بيشوفوا عيونك كل الناس
ويباتوا ف حضنك لما الليل
يطلعله نهار موصول المد
ويطل بشمس مدارها عنيك
وتمد شعاعها في روح لياليك
وتبات في عنيك. .ماتبانش لحد
يا حكاية عشق مالوهش حدود
وطريق مفتوح ع الروح. .موصود
قطارات العمر اللي انطلقت
لجهات مختلفه ياريتها تعود
