شعر: سعد الشرقاوى:
الأسعار والأسعار والأسعار
والغلبان عايش فى النار
الليّ بيكسب عايز ينـْهب
والمستهلك عيشته مرار
م الأسعار والأسعار والأسعار
,,,
الأسعار وبقينا ف غابة
نصْ الشعب أسود وديابه
والليّ ما شافش ف مصر غلابه
يبقى مُغفـّل يبقى حمار
م الأسعار والأسعار والأسعار
,,,
الأسعار وما عادش كسوف
والليّ يعيش يا مه لسّه يشوف
كلـّه بيلعب ع المكشوف
لأ ..يا حكومة كفايا هزار
م الأسعار والأسعار والأسعار
,,,
الأسعار من غير عدّاد
كل دقيقة مؤشـّر زاد
حتىّ الواد عبدالجوّاد
طالع نازل كالمنشار
م الأسعار والأسعار والأسعار
,,,
الأسعار حكايتها حكايه
رصّت كلـّه على الشوّاية
لآ يا حكومه خلاص بكفايه
والله ما عاد عندك أعزار
م الأسعار والأسعار والأسعار
,,,
الأسعار والبنت بهيّه
رهنت شالها عشان طبليّه
خايف أقول زعرطي يا وليّه
تحلف مانا ساكنالك دّار
م الأسعار والأسعار والأسعار
,,,
الأسعار وأنا ابني مبوّز
قال لخطيبته أنا مش متجوّز
تصبُري لمـّا القطن يلوّز
وأقدراجيبلك كيلو خيار
م الأسعار والأسعار والأسعار
,,,
الأسعار وما عادش فلوس
تشبع رغبة أيْ لصوص
والليّ قلع وصبح بلـْبُوص
مُش ح يخاف أبدا م العار
الأسعار والأسعار والأسعار
,,,
الأسعار والجيب مسروق
مين بيراقب مين فى السوق
واللا يطبْطب على مخلوق
صبح القط يخاف م الفار
الأسعار وألأسعار والأسعار
,,,
الأسعار ما فيهاش منظومة
واللا جيوبنا بقت مخرومه
نفسي اقول سلامات يا حكومة
علشان تصبح مصر عمار
م الأسعار والاسعار والأسعار