تقرير: إسلام خليل
نستهل هذا الموضوع عزيزي القارئ والسادة المسؤولين بهذه الكلمات
كارثة يعيشها مواطنين من رعايا الدولة المصرية قرية الديابة وهو اسمها فى الملفات الرسمية وداخل الدواوين الحكومية هى قرية مصرية من إحدى قرى مركز الحامول كفر الشيخ أهلها بسطاء يعيشون وراضون بما أعطاهم الله من نعم وراضون بقضاء الله كما قال أحد سكانها وإلتقت جريدة مع الناس نيوز .
مع أحد سكانها وهو حامد توفيق الديب فسألناه عما يعانون منه أجاب فى ألم إحنا ناس بسيطة خالص مالناش غير شغلنا وأكل عيشنا والعمل فى حقولنا حتى نستطيع أن نتعايش ولكن نعيش معاناه شديدة أهمها أننا فى فصل الشتاء وعندنا طلبة فى المدارس عند سقوط الأمطار تصاب حياتنا بالشلل كل أبنائنا لا تستطيع الزهاب لمدارسهم وأيضا نحن لا نستطيع ممارسة أعمالنا ولا نستطيع الذهاب لقضاء حاجتنا من المدينة نظرا لكون الطريق المؤدى لقريتنا ترابى وعند سقوط الأمطار الطريق يصبح وحل لأن معندناش اسفلت هكذا قالها المواطن البسيط .
وأيضا كان لنا لقاء مع مواطن آخر مقيم بهذه القرية أسمه جمال محمد الديب ماشكواك أجاب مياه الشرب مش بتيجى إلا فترات بسيطة بالرغم إننا قريبين من محطة مياه الشرب لكن مش عارفين ليه مقطوعه معظم الوقت وأضاف أن هذه المشكلة بقالها سنين طويلة والسادة المسؤولين حاولنا معاهم كتير ودائما ردودهم حاضر هنشوف ومفيش فايدة وييجى اول الشهر محصل المياه ييجى يحصل الفواتير وبندفع لأننا بنحترم القوانين ولازم أى إلتزامات للدولة ندفعها عشان دى بلدنا وبنحبها وماينفعش نبقى معارضين للقوانين .
وقابلنا أحد المواطنين وهو من كبار السن بالقرية وهو حسن إبراهيم الديب وسألناه ما شكواك أجاب إن والدته فى يوم تعبت وكان الجو ممطر والطريق انقطع بسبب أن مفيش اسفلت وإضطر يشيلها على كتفه حتى الخروج للطريق العمومى واوقف سيارة لذهاب والدته للمستشفى التى تبعد عنهم مسافة كبيرة وان نفسهم يكون فى وحدة صحية قريبة منهم لنجدة كبار السن والمرضى بالقرية حتى ترعة الرى المحافظة كانت بدأت مشروع عشان تساعدنا أراضينا يوصل لها مياه الرى وبعد كده عملو مرحلة ووقفوا على كده الطرق منهارة المجاورة الترعة وتمنع مياه الرى من الوصول لأرضنا ومعانا صور من مستندات تفيد بالخطة السابقة التى أدرجت فيها ترعة الرى وتوقفت ولا نعلم ليه المشروع توقف وبرضه معانا صورة لآخر خطة تم إدراج الطريق الاسفلت المؤدى للقرية وبرضه توقف مع العلم إننا عارفين إن توجيهات سيادة الرئيس عبد الفتاح السيسي رئيس بلدنا اللى كلنا بنحبه إن مفيش مشروع يتم إدراجه ويتوقف لابد من الإنتهاء منه ثم إدراج مشروع جديد .
إحنا مالناش طلبات صعبة عاوزين طريق نمشى عليه ومشكلة الرى بمنطقتنا تنتهى واستكمال المشروع العظيم الذى بدأته الحكومة وشربة مياه إحنا بندفع كهرباء زى اللى مقيم فى اسكندرية ومصر وبندفع فواتير كهرباء برضه زى اللى مقيم فى المدينة وكل الرسوم اللى بتحددها الدولة ملتزمين بيها ولا نعترض على قرارات الحكومة وإنتاج قريتنا بيدخل ضمن السلع اللى بتنفع بلدنا بنشتغل ليل نهار ومفيش عندنا إلا الشغل عشان ننفع بلدنا بس نفسنا الحكومة تبص لنا وتشوف إحنا عايشين إزاى ده إحنا لمينا فى وقت من الأوقات فلوس وجبنا على نفقتنا سن فردناه على الطريق على حسابنا عشان نقدر نوصل للمدينة .
وفى جولة لفريق عمل الجريدة إلتقطنا بعض الصور على الطبيعة ووجدنا كارثة أكبر طريق مؤدى لهذه القرية منهار وانقطع بسبب أنه أصبح خطر داهم يهدد حياه المارة .
إذ نناشد السادة المسؤولين السيد اللواء محافظ كفر الشيخ والسيد رئيس مركز ومدينة الحامول حرصا على المواطنين المقيمين بهذه القرية وتوابعها النظر فى مطالبهم حفظ الله وطننا الغالي مصر .
