سافرنا وأتغربنا وإتوجعنا من الغربة و حنين اللمة و لما رجعنا ..كنا بنقول عمار يامصر .. و من زمن الزمن كنا كمتغربين لينا أسبابنا سواء في هدوء أسعارها أو لمسة دافئة من ناسها .. وطول عمرنا الفقير قبل الغني بيلاقي لقمة يسد بيها جوعه و محدش بينام من غير عشا.

و برضه بعد لما أندمجنا جوه ظروفنا و مخرجناش خارج حدودنا و لما رجعنا من سنوات كثير من غير عدد توقفت فيها احلامنا و تقوقعت أفكارنا لسنوات طويلة عدت الثلاثين سنة .. بس من كام سنة لاقينا الدنيا أتغيرت ..شكل الأماكن و البيوت أتجملت ..حركة التعمير و التغيير و التعديل أتكملت .. دلوقتي بنقولها بعلو صوتنا عمار يا مصر ..وده أصبح حقيقة بنشوفها في كل مجال .

عمار يا مصر مش شعار لا ...ده منهج بدأناه من رحلة الإصلاح الحقيقي سواء كان سياسي أو اقتصادي أو مالي أو رقابي وصولا للإصلاح الأخلاقي أساس كل نجاح يدوم .

بتتباهي لما بيجيلك ضيوفك و يشوفوا كل مظاهر التحسين و التجميل من تعمير و تغيير وتطوير شمل كل المجالات...وقتها بتقول و بكل إنبهار عمار يامصر ..

الكلمة دلوقتي أصبح لها مدلول أخر ...غير بتاع زمان ...دلوقتي بقي معناه الفخر بإنتصاراتنا في إقتحامتنا الحقيقية لمشكلاتتا الغائرة من سنين تعبنا من تذكرها وعدها.

و الحمد لله دلوقتي قدرنا بالارادة الفولاذية و حسن القيادة و رشد و حنكة القرار الصامد ..و بثقة في رؤية تم رسمها بأنامل من ذهب ..أخرجت لنا تابلوه فني جميل يناشد و يغازل حلم جيل جديد .

و قدرنا بتمسكنا بأن حقنا مش بس نحلم و نصحي في كل ثانية علي جديد ... لا .. ده أتطورت طموحاتنا و آمالنا وبقي كمان بنحلم بحلم متكامل نشوف فيه الصورة حلوة أوووي بجد من كل زاوية وحد .

ولما هيجي وقت قص الشريط و نروح و نيجي و نفرح لجملة الانجازات اللي تم جوه محافظاتنا .. لحياة كريمة .. و من العاصمة الجديدة.. للعلمين ..لمشروعات مستقبل مصر الغذائي .. لمركز للغاز العالمي.. لمصايد للاسماك من البحر الاحمر حتي المتوسط و هنوصل كمان للمحيط .

من كل قلبي بقولها و أنا فخورة ذي كل مخلصينك يا غالية .. و بيقولوا معايا عمار يامصر ..عمار يامصر ..تحيا مصر .

بقلم / سلوى محمد على ، مدير عام مساعد بقطاع البترول و عضو الاتحاد العربي للعمل الإنساني و التنمية المستدامة التابع لجامعة الدول العربية و سفيرة المناخ